Tshirendo

Tshirendo itshi asi tshirendo
Ndi bomepome ndi bonyongo
Ndi dzi pfudzungule
Ndi huwahuwa

Tshirendo itshi ndi lutsinga
Lu elaho na mulambo Mutshundudi
Ndi mahovhohovho a Phiphidi
Ndi thombo dza tshiwa misevhe

Tshirendo itshi asi tshirendo
Ndi tshihwilili tsha vho-Hangwani
Ndi mavhevhe a vha shambili
Ndi ngosha dza zwilombe

Tshirendo itshi ndi mapfuvhi
Ane u tswuka anga mulilo
Ndi khavhu dza mafhafhado
Ndi u ngwaluwa ha tsimbi i lilaho

Tshirendo itshi asi tshirendo
Ndi mufhululu
I lilela vho-Makhado
I lilela vho-Mphephu Ramabulana

Tshirendo itshi ndi nduvho
Ngulumbi ha Makwarela Vemba la nwenda Makhuge
Tshivhasa Midiya vhathu wawe wa sala
Miluwani ha vho Ratshigugu

Tshirendo itshi asi tshirendo
Ngazwo tsho dala u silinga na u nengisa
Mudzio watsho we ndi bva vhubvo
Vha u pfa vha si tshi pfesese

Tshirendo itshi ndi mbodza ino kho di do bikwa
A tshi gumi tshi ela sa Lubvuvhu
Tsha khuya vhuhwini ha ngelelekanyo
tsha nwala kha mitaladzi isa fheli

Hetshi tshi rendo asi tshirendo
Ndi sudzi le la ponyoka
Ali na muthivhi
Tshalo ndi u pfudela

A vha tshi pfi
Ngauri atshiathu rendwa
A vha tshi vhoni
Ngauri atshi athu nwalwa

Tsho vha nengisa tsho vha kwatisa
Vha funa tshi  tshi pfuvha sa mufuvha
Mara atshi pfuvhi, a tshipfi mazha!
Ngauri Tshirendo itshi atshi ho
A tshi a thu nwala
A tshi athu rendwa
A tshi a thu pfiwa
Atshi athu vhonwa
A tshi ho
Tshi thohoni yavho